Украинадан Польшага эвакуация болгон 95 Кыргыз жараны өлкөгө кайтып келди

Бүгүн, 19-мартта Украинадан Польшага эвакуация болгон 95 Кыргыз жараны чартердик каттам менен өлкөгө кайтып келди. Бул тууралуу ТИМдин маалымат таратышты.

Министрликтин маалыматына таянсак, алардын ичинде аялдар жана балдар бар.

Мындан тышкары Чехиядан Ошко 43, Прагадан Бишкекке 35 Кыргыз жараны кайтып келди.

Министрлик жана элчилик Кыргыз жарандарын Польшадан, Чехиядан эвакуациялоо, ошондой эле Украинанын согуштук аракеттер жүрүп жаткан шаарларында жүргөн Кыргыз жарандарын коопсуз аймактарга чыгаруу боюнча иштерди улантууда.

"Бүгүнкү күндө Украинанын аймагында 60тан ашык Кыргыз жараны бар. Элчилик Украинада калган жарандар менен байланышта, алардын көбү жашаган жеринде калуу каалоосун билдиришүүдө. Кыргыз жарандарынын арасында жабыркагандар жок", - деп жазылат ТИМдин маалыматында.