Дарыгер Ноокаттагы төрөт үйүндө энелердин өлүмү, ымыркайлардын каза болушунун саны өспөгөнүн айтты

Ноокат райондук жалпы дарыгердик практика борборунун директорунун дарылоо иштери боюнча орун басары Сайрагүл Үсөнова энелердин өлүмүнүн саны өспөгөнүн айтты. Бул тууралуу ал журналисттерге билдирди.

"2012-2013-жылдан баштап реформа менен иштеп жатабыз. Чет элдик өлкөлөрдүн инвесторлору менен биргеликте иштеп жаткандын эсеби менен үзгүлтүксүз окутуулар уюштурулуп, жабдуулар менен камсыздалып, капиталдык ремонттор жүрүп жатат.

Мындан улам көпчүлүк көрсөткүчтөр жакшы жакка өзгөрдү. Мисалы, төрөт учурунда энелердин каза болушу акыркы жылдары туруктуу турат. Жылына бирден энелер каза болуп жатат. Көрүп жатканыңыздардай, энелердин өлүмү республика боюнча көбөйүп жатат. Бирок биздин райондо туруктуу турат. Балдардын өлүк төрөлгөнүнүн саны дагы туруктуу турат. Төрөт үйүндө чарчап калган ымыркайлардын саны азайууда", - деди ал.

ЮНИСЕФ аталган борбордун төрөтканасына жабдууларды берип, оңдоп-түзөөдөн өткөргөн. Бул боюнча ЮНИСЕФ журналисттерге пресс-тур уюштурду.