Министрлер кабинети өзгөчө кырдаал режимин алып салууну министрликтерге тапшырды

Министрлер кабинетинин төрагасынын орун басары Эдил Байсалов коронавирус инфекциясына каршы күрөшүү боюнча ыкчам штабдын жыйынын өткөрдү. Бул тууралуу министрлер кабинетинин басма сз кызматынан билдиришти.

Маалыматка ылайык, Өзгөчө кырдаалдар министрлигине жана Саламаттыкты сактоо министрлигине республикадагы өзгөчө кырдаалды алып салуу мүмкүнчүлүгүн иштеп чыгуу тапшырмасы берилди.

Саламаттыкты сактоо министрлиги өлкөдөгү эпидемиологиялык абал боюнча маалымат берип, учурда абал туруктуу экенин белгилешти. Андан соң жыйындын катышуучулары COVID-19га каршы эмдөөнүн жүрүшү тууралуу маалымат угушту. Калкты эмдөө иштери уланып жатканы айтылды.

Талкуунун жыйынтыгында Эдил Байсалов Өзгөчө кырдаалдар министрлигине Саламаттыкты сактоо министрлиги менен биргеликте өкмөттүн 2020-жылдын 22-мартындагы №93-р токтому менен киргизилген өзгөчө кырдаал режимин жокко чыгаруу мүмкүндүгү жөнүндө маселени иштеп чыгууну тапшырды.

Тышкы иштер министрлигине Кыргыз-Өзбек мамлекеттик чек арасынан өтүүдө Кыргыз жарандарынын коронавирустук инфекциясын аныктоого милдеттүү экспресс-тесттен өтүүнү жокко чыгаруу маселесин иштеп чыгуу тапшырылды.

Ошону менен бирге президенттин аймактардагы ыйгарым укуктуу өкүлдөрүнө Саламаттыкты сактоо министрлиги менен биргеликте калкты COVID-19га каршы эмдөө өнөктүгүн улантуу тапшырылды.