Өлкөдөгү музейлердин абалы тууралуу талкууланды

8-апрелде Жогорку Кеңештин “Ыйман Нуру” фракциясынын депутаттары Кыргыз Улуттук тарых музейинде көчмө жыйын өткөрдү. Бул тууралуу парламенттин басма сөз кызматынан билдиришти.

Жыйынга маданият маалымат, спорт жана жаштар саясаты министринин орун басары Чынгыз Эсенгул уулу, "Ата-Бейит" улуттук тарыхый-мемориалдык комплексинин жетекчиси Рыскул Боронбаев, Г.Айтиев атындагы Кыргыз улуттук көркөм сүрөт музейинин жетекчиси Сарина Дайырова, М.В.Фрунзе атындагы үй музейинин жетекчиси Бакыт Бакчиев катышты.

Жыйында өлкөдөгү музейлердин абалы талкууга алынып, анын ичинен бир катар көйгөйлөр жана аны чечүү жолдору айтылды.

Айрыкча, музей жетекчилери тарыхый экспонаттарды алууга каржылык колдоо көрсөтүү маселесин көтөрүшүп, муну менен катар адистердин жетишсиздиги актуалдуу экенине токтолушту.

Талкуу соңунда айтылган көйгөйлөр эске алынары белгиленип, фракция мүчөлөрү аларды чечүү багытында Министрлер кабинетине керектүү сунуштарды беришерин кошумчалашты.