УКМК: 82 миллион сомдон ашык зыяндын орду толтурулду

82 миллион сомдон ашык зыяндын орду толтурулду. Бул тууралуу УКМКнын басма сөз кызматынан билдиришти.

Маалыматка ылайык, Кылмыш-жаза кодексинин 336-беренесинин 1-бөлүмү менен козголгон кылмыш ишинин алкагында, Чүй облусунун Сокулук районунда жайгашкан «Бишкек машина куруучу завод» ААКга таандык болгон жалпы аянты 62 гектар жер тилкесин мамлекетке кайтарып берүү түрүндөгү 82 миллион сомдон ашык суммадагы зыяндын ордун толтурду.

"Тергөөнүн жүрүшүндө бул кылмышты уюштурууга прокуратуранын, Сокулук районунун мамлекеттик реестринин жана Бишкектеги машина куруучу завод (БМЗ) ААКсынын кызмат адамдарынын түздөн-түз катыштыгы бар экендиги аныкталган. Жүргүзүлгөн кылмыш ишинин алкагында Башкы прокуратуранын кызматкери, «БМЗ» ААКнын кызматкери жана эки жаран кармалды. Учурда кылмышка тиешеси бар башка адамдарды аныктоо боюнча тергөө жана ыкчам издөө иш-чаралары жүрүп жатат", - деп жазылат маалыматта.