Бишкекте Бакен Кыдыкееванын 90 жылдыгы белгиленет

Театр жана кино жылдызы Бакен Кыдыкееванын 90 жылдык мааракеси болот. Бул тууралуу Кыргыз Республикасынын Маданият, маалымат жана туризм министрлигинин басма сөз кызматы кабарлайт. Маалыматка караганда, СССРдин Эл артисти, Мамлекеттик Токтогул атындагы сыйлыктын лауреаты Бакен Кыдыкееванын 90 жылдык мааракеси 2013-жылдын 4-декабрында Т.Абдумомунов атындагы Кыргыз улуттук академиялык драма театрында белгиленет.

Кыдыкееванын 90 жылдыгына арналган иш-чаралардын тартиби:

4-декабрда саат 10:00дө актрисанын "Ала-Арча" көрүстөндөгү эстелигине гүл коюу аземи болот.

17:00дө анын 90 жылдык мааракесине арналган документалдуу фотокөргөзмө өтөт.

17:30да мааракеге арналган салтанаттуу кече болот. Ага искусство адамдары, маданият кызматкерлери, өкмөт мүчөлөрү катышат.

Кошумчалай кетсек, Бакен Кыдыкеева 1923-жылы 20-октябрда Чүй облусунун Аламүдүн районуна караштуу Төкөлдөш айылында жарык дүйнөгө келген. Ал кыргыз сахнасынын ханышасы аталып, бир катар спектаклдер менен кинотасмаларда башкы каармандардын ролун жараткан.