Казакстан мыйзам бузуулардан улам чек арадагы көзөмөл кайра күчөтүлөрүн маалымдады

Казакстан чек арадагы өткөрмө бекеттерде көзөмөл кайрадан күчөтөрүн билдирди. Бул тууралуу Казакстандын Мамлекеттик кирешелер комитетинен билдиришти.

Маалыматка ылайык, 28-апрелде Кыргызстандан чыккан жүк ташуучу унаадан Беларустун 1 миллиондон ашуун жасалма акциздик маркалары табылган. Ушул эле унаадан 2 миңден ашуун декларацияланбаган товар алынганы кабарланды. Мындан улам Казакстан көзөмөлдү күчөтөрүн билдирди.

Белгилей кетсек, 20-апрелде кыргыз-казак өкмөттөрү эркин соода жүгүртүү боюнча чечимдерди кабыл алган. Анда кыргыз тарап жүк ташуучу унааларды товар үчүн электрондук эсеп-фактура жок чыгарбоону убадалаган. Ал эми Казакстан текшерүүнү азайтып, транзиттик товарларды кароосуз өткөрө турган болгон.