Таласта жансыз денеси табылган жарандын өлүмүнүн жагдайлары айтылды

Бүгүн, 16-майда Талас шаарында көп кабаттуу үйлөрдүн биринен эркек кишинин жансыз денеси табылганы кабарланган. Облустук ички иштер башкармалыгынын маалымат кызматынан маркум бычактан алган жаракатынан улам каза болгонун кабарлады.

Бүгүн саат 07:50 чамасында милиция кызматкерлерине Талас шаардык "Тез жардам" кызматы тарабынан 1989-жылы туулган А.Н. өз үйүндө бычактан жаракат алып каза болгондугу тууралуу кабарланган.

Аталган факты электрондук журналга катталып, тергөөгө чейинки текшерүү иши башталган.

"Шаардык ыкчам-тергөө тобу окуя болгон жерге барып, маркумдун сөөгү өзү жашаган үйдүн уктоочу бөлмөсүндө жаткандыгын жана үйдүн коридорунан мизинде канга окшош кочкул тактары бар ашкана бычагын табышкан. Каза болгон жарандын жансыз денесине соттук-медициналык экспертиза дайындалды.

Эксперттин катышуусунда денеге сырткы кароо жүргүзүлүп, тытылган жаракаттары бар экендиги жана төшүнүн сол жагында, тактап айтканда, жүрөк тушка учтуу курч нерсе менен сайылгандыгы белгилүү болду. Бул окуя боюнча 122-берененин 1-бөлүгүндө каралган "Адам өлтүрүү" фактысы менен кылмыш иши козголду.
Кылмыш иши боюнча тиешелүү соттук эскпертизалар дайындалып, багыттама жана тапшырмалар берилди. Кылмыштын бетин ачуу максатында милиция кызматкерлери тарабынан ыкчам иликтөө жана тергөө амалдары жүргүзүлүп жатат", - дешти мекемеден.