Чет элдик инвесторлор үчүн. Бир катар мыйзамдар, укуктук актылар англис тилине которулат

Министрлер кабинетинин төрагасы Акылбек Жапаров Экономика жана коммерция министрлигине Тышкы иштер министрлиги менен биргеликте Кыргыз Республикасынын бир катар ченемдик укуктук актыларынын англис тилиндеги котормосун даярдоону тапшырды.

Бул демилге чет өлкөлүк инвесторлордун Кыргыз Республикасынын мыйзамдары жөнүндө зарыл жана маанилүү маалыматтарга жеткиликтүүлүгүн жогорулатат жана өлкөнүн инвестициялык климатына оң таасирин тийгизет дешет министрлер кабинетинен.

Чечимге ылайык, Кылмыш-жаза кодекси, Укук бузуулар жана Салык кодекстери, "Мамлекеттик-жеке өнөктөштүк жөнүндө", "Тышкы миграция жөнүндө" мыйзамдар жана инвестиция жаатындагы башка ченемдик укуктук актылар англис тилине которулат.

Документтер которулгандан кийин тексттер министрлер кабинети тарабынан таанылган расмий котормо катары бекитилет.