Бишкектеги унаа жуучу жайдан 27 жаштагы жаран Toyota Highlander унаасын уурдап кетти

Бишкекте унаа уурдоого шектелген 27 жаштагы жаран кармалды. Бул тууралуу Ленин райондук ички иштер бөлүмүнүн басма сөз кызматы билдирди.

Билдирүүгө ылайык, 19-май күнү милицияга Т.К. аттуу борбор калаанын тургуну кайрылган. Арызында ал ошол эле күнү саат 01:15 чамасында Матыев көчөсүндөгү унаа жуучу жайдан Toyota Highlander үлгүсүндөгү унаасын уурдап кеткендигин билдирген.

Ыкчам иликтөө иштеринин натыйжасында кылмышка шектүү катары 1995-жылы туулган Э.К. аттуу жаран кармалып, бир айга камакка алынган.

Уурдалган унаа арыз ээсине кайтарылып берилди. Учурда тергөө иштери жүрүп жатат.