Ош облусунун бир катар аймактарында сел жүрүп, 20дай үй-бүлө туугандарыныкына көчүрүлдү

Ош облусунда нөшөрлүү жаан-чачындан улам бир катар аймактарда сел жүрүп, турак үйлөрдүн короолорун суу каптады. Ошондой эле электр жарыгы үзгүлтүккө учураганын Өзгөчө кырдаалдар министрлигинен билдиришти.

Маалым болгондой, 27-майда саат 19:30 чамасында Өзгөн районунун Салам-Алик айыл өкмөтүндө кокту-колоттордон келген сел суулар Кош-Этер айылынын ички чарбалык жолдорун каптап, 1 турак үйгө суу кирди (кум аралаш масса каптаган) жана 18 турак үйгө кооптулук жаралды. Турак үйлөрдүн тургундары туугандарыныкына көчүрүлдү. Ошондой эле Алтын-Булак айыл өкмөтүнүн Чечебай айылында ички чарбалык жолдун 150 метр аралыгын жана 20 турак үйдүн короосун каптаган.

Ал эми саат 20:15 чамасында Кара-Кулжа районунун Кара-Кочкор айыл өкмөтүндө жааган жаандын кесепетинен кокту-колоттордон келген сел суулары сайга батпай Сары-Булак айылынын Таштак тилкесинде 1,5-чакырым ички чарбалык жолду каптаган. Ошондой эле Ылай-Талаа айылында "Суу чарба башкармалыгынын" балансындагы эгин сугаруучу каналынан суу ашып 25 турак үйлөрдүн короо жайларын каптаган. Ылай-Талаа жана Чалма айылдарында электр жарыгы өчүп, райондук электр тармактар ишканасы тарабынан оңдоо иштери жүргүзүлүүдө.