Нарын шаарында “Кылмыштуулукка жол жок” аталыштагы жөө жүрүш өткөрүлдү

2-июнь күнү Нарын ОИИБнин жана Нарын ШИИБнин демилгеси менен жөө жүрүш уюштурулуп өткөрүлдү. Бул тууралуу Нарын ОИИБнин басма сөз кызматы кабарлады.

Маалыматка ылайык, иш-чарага Нарын ОИИБнин начальниги Алмазбек Жумабеков, шаардык бийлик өкүлдөрү, Нарын шаардык билим берүү бөлүмүнүн кызматкерлери, жалпы билим берүүчү орто мектептердин директорлору жана жогорку класстын окуучулары катышты.

Бул жөө жүрүштүн максаты - өспүрүмдөр арасында кылмыштуулукка, рекетчиликке, зордук-зомбулукка каршы жана ар кандай кылмыш кырсыктардан оолак болууга үндөө болуп саналат.

Иш-чарага катышкан бийлик өкүлдөрү мектеп окуучуларына акыл-насааттары менен бөлүшүп, келечек муундарга дем, күч берип аларды сергек жашоого, терең билим алууга жана туура кесип тандоого багыт берүү менен патриоттуулукка үндөп ынтымакка чакырып өтүштү.