Кыргызстан менен Тажикстандын чек арачылары кошумча күчтөрдү чыгарып кетүүнү макулдашты

Баткен районунун Булак-Башы жана Төрт-Көчө тилкелеринде Кыргызстан менен Тажикстандын чек ара өкүлдөрүнүн жолугушуусу өттү. Бул тууралуу УКМКнын басма сөз кызматынан билдиришти.

Сүйлөшүүлөрдүн жыйынтыгында тараптар төмөнкүдөй макулдашууларды кабыл алышты:

- бекемдөө катары келген кошумча күчтөрдү жана каражаттарды туруктуу жайгаштыруу пункттарына чыгарып кетүү;

- чек арачыларды эки тараптуу негизде алмаштыруу;

- инженердик курулуштарды демонтаждоо;

- үстөмдүк кылган бийиктиктерге чек ара тозотун жиберүүгө тыюу салуу.

Андан кийин Төрт-Көчө аймагында УКМКнын Баткен облусу боюнча башкармалыгынын башчысы менен Тажикстандын УКМКсынын Согди облусу боюнча башчылары жолугушуу өткөргөн.

Жолугушууга тараптардын чек ара заставаларынын жетекчилери да катышты. Сүйлөшүүлөрдүн жүрүшүндө тараптар жетишилген макулдашууларды аткаруу, чыр-чатактын күчөшүнө жол бербөө жана бардык пайда болгон маселелерди сүйлөшүү жолу менен чечүү зарылдыгын белгилешти.

Мамлекеттик чек ара сызыгынан кошумча күчтөрдү жана каражаттарды чыгарууну Кыргызстан менен Тажикстандын чек ара заставаларынын жетекчилери көзөмөлдөйт. Саат 19:20га карата мамлекеттик чек аранын кыргыз-тажик тилкесинде абал салыштырмалуу туруктуу.