"Ала-Тоо" аквапаркында каза болгон окуучунун классташтарынын ата-энелери митингге чыгышты

Бүгүн, 12-июнь күнү Билим берүү жана илим министрлигинин имаратынын алдында №95 мектептин окуучуларынын ата-энелери митингге чыгышты.

Ата-энелер №95 мектептин директору Айгүл Шимованы жоопко тартууну жана анын финансылык иштерин териштирүүнү талап кылышууда. Катышуучулар ошондой эле 3-класстын окуучусу сууга чөгүп каза болгон аквапарктын администрациясына тиешелүү жаза берүүнү суранышууда.

Маалымат үчүн:

6-июнда Бишкек шаарындагы "Ала-Тоо" аквапаркында 3-класстын окуучусу сууга чөгүп кетип каза болгон. Окуя боюнча шаардык мэрия комиссия түзгөн. Каргашалуу окуядан кийин мектептин завучу жана 6 мугалими иштен алынды.

Ошондой эле мектеп директоруна да коопсуздук чараларын, балдардын укугу менен саламаттыгын көзөмөлдөбөгөнү үчүн чара көрүү каралды. Комиссия аныктагандай, аквапаркка жалпысынан 232 окуучу, 9 мугалим жана 9 ата-эне барган. Каргашалуу окуядан 3 күн өткөн соң аквапарктын администрациясы комментарий берген.