Депутат Бакыт Асанбаевдин өлүмү боюнча кылмыш ишин козгоо керектигин айтты

Улуттук коопсуздук боюнча мамлекеттик комитетинин тергөө абагында "Айыл Банктын" мурдагы жетекчисинин орун басары Бакыт Асанбаев өз жанын кыйган окуя боюнча депутат Дастан Бекешев өзүнүн Телеграм каналына билдирүү калтырды.

"УКМКнын СИЗОсунда өз жанын кыйган Бакыт Асанбаевдин өлүмү боюнча кылмыш ишин козгоп, УКМКнын тергөө абагынын башчысын, анын орун басарын кызматтан алуу керек. Себеби аларга тергөө изоляторун көзөмөлдөө функциясы жүктөлгөн. Кылмыш ишин объективдүү иликтөө үчүн Башкы прокуратуранын кызматкерлеринен тергөө тобу түзүлүшү керек. УКМКнын СИЗОсунун тагдыры тууралуу ойлонууга убакыт жетти. Балким, аны жоюу жакшыдыр. Бул СИЗОдо бир жумада эки өлүм катталды. Бизди ал жерде баары жайында экенине ишендире алышат, бирок мыйзамсыздык адамдардын өлүмү аркылуу көрүнүп жатат", - деп жазган ал.

Эскерте кетсек, буга чейин Улуттук коопсуздук боюнча мамлекеттик комитетинин тергөө абагында "Айыл Банктын" мурдагы жетекчисинин орун басары Бакыт Асанбаев өз жанын кыйганы жазылган.

Ал эми 10-июнда УКМКнын тергөө камак жайынан ооруканага түшкөн саясий серепчи Марат Казакпаев каза болгон.