Министр жөлөк пулдар 200 пайызга чейин жогорулаганын айтты

Ай сайын берилүүчү жөлөк пулдар 200 пайызга чейин жогорулатылды. Бул тууралуу эмгек, социалдык камсыздоо жана миграция министри Кудайберген Базарбаев маалымат жыйында билдирди.

"2021-жылдын 1-октябрынан тарта президент Садыр Жапаровдун жарлыгына ылайык, мамлекеттик жөлөк пулдардын өлчөмү масштабдуу түрдө жогорулатылды.

Ден соолугунан мүмкүнчүлүгү чектелген адамдарга, ата-энесинен айрылган балдарга, ай сайын берилүүчү социалдык жөлөк пулдар 100 пайыздан 200 пайызга чейин жогорулатылды. Маселен, ден соолугунан мүмкүнчүлүгү чектелүү балдар мурда 4000 сом алса, учурда 8000 сом алышууда", - деп билдирди министр.

Ошондой эле 1-июндан баштап жалпы оорудан майыптыгы бар адамдарга, улгайган адамдарга, баатыр энелерге социалдык жөлөк пулдардын өлчөмү 50 пайыздан 200 пайызга чейин жогорулатылгандыгын кошумчалады.