Франциялык футболчу Поль Погба “Golden Boy-2013” сыйлыгын утуп алды

Италиялык “Ювентустун” жана Франция курама командасынын жарым коргоочусу  Поль Погба жыл сайын “Tuttosport” басылмасы тарабынан  ыйгарылуучу “Golden Boy” сыйлыгына ээ болду. Бул тууралуу бүгүн, 4-декабрда европалык басылмалар билдиришти.

Маалыматка ылайык, бул сыйлык “Tuttosport” басылмасы тарабынан жыл сайын Европанын мамлекеттеринин лигаларында ойногон 21 жашка чейинки жаш футболчуларга тапшырылат.

2013-жылкы сыйлык ээси Погба добуш берүүдө 256 упай топтоду. 2-орунду англиялык “Эвертондун” бельгиялык чабуулчусу Ромелу Лукаку ээледи (129 упай). Алдынкы үчтүккө германиялык “Шалькенин" оюнчусу Юлиан Дракслер кирди (120 упай).

Эске салсак, бул сыйлык 2003-жылдан бери ыйгарылып келет. Буга чейин “Golden boy” сыйлыгын түрдүү жылдары Рафаэль ван дер Варт (2003-жыл), Уэйн Руни (2004), Лионель Месси (2005), Сеск Фабрегас (2006), Серхио Агуэро (2007), Андерсон (2008), Алешандре Пато (2009), Марио Балотелли (2010), Марио Гётце (2011), Иско (2012) сыяктуу оюнчулар алган.