Алымкадыр Бейшеналиев саламаттыкты сактоо министри кызматына кайтууга даяр

Алымкадыр Бейшеналиев Саламаттыкты сактоо министринин кызматына киришүүгө даяр. Бул тууралуу SUPER.KG порталы байланышканыбызда билдирди.

"Министр болуп ишке чыгууга даярмын. Калганын жактоочум айтып берди. Буга чейин сот иштери менен алек болдум. Үйдө, тергөөдө, сотто жүрдүм", - деди Бейшеналиев.

Бүгүн Бейшеналиевдин аракетинде кылмыштын курамы жок болгондуктан ага карата козголгон кылмыш иши кыскартылды.

Белгилей кетсек, Алымкадыр Бейшеналиев 2-июнда Башкы прокуратура тарабынан кармалган. Ага жети кылмыш иши козголгону белгилүү болгон. Президент Башкы прокуратура тарабынан коррупцияга шектелип кармалган саламаттыкты сактоо министри Алымкадыр Бейшеналиевдин иши боюнча комиссия түзүлгөнүн билдирген.

Андан кийин министр тергөө иштерине байланыштуу убактылуу кызматтан четтетилип, 1 айга СИЗОго камакка алынып, кийин кайра үй камагына чыгарылган. Жактоочу Алымкадыр Бейшеналиевдин ишинде материалдык чыгым табылбаганын билдирген.