Бишкекте синтетикалык баңгизаттарды өндүргөн лаборатория аныкталды (сүрөт)

Бишкектин аймагынан ири өлчөмдө синтетикалык баңгизаттарды өндүргөн лаборатория аныкталды. ИИМден билдиргендей, 1-июнда сотко чейинки өндүрүштүн алкагында Бишкек шаарынын Лев Толстой жана Султан Ибраимов көчөлөрүнүн кесилишинен З.Э. аттуу жаран кармалган. Анын барсеткасынан 95 грамм болгон «Альфа-ПВП» психотроптук каражат табылган.

Андан аркы кармалган жарандын жашаган үйүнө кечиктирилгис тинтүү жүргүзүлгөн. Натыйжада бөлмөлөрдүн биринде баңгизаттарды өндүргөн лаборатория аныкталып, химиялык каражаттар жана синтетикалык баңгизаттарды өндүрүү үчүн жабдыктар (суюктук, тараза, идиштер, респиратор жана башкалар) табылган. Андан сырткары, кармалган жаран буга чейин 347 грамм болгон «Альфа-ПВП» психотроптук каражатты катып койгон көмүскө жайды көрсөтүп берген.

Табылып алынган «Альфа-ПВП» психотроптук каражаттын жалпы салмагы 471 граммды түзүп, ал 1500000 сомдон ашык суммага бааланган. Ошондой эле өзгөчө кескин жыты бар күрөң түстөгү каражат салынган 6 канистр табылды.

Экспертизанын корутундусуна ылайык, 2 канистрде суюктук түрүндөгү «Альфа-ПВП» психотроптук каражаты, ал эми 4 канистрде аларды даярдоо үчүн заттар болгон. Азыркы учурда бул кылмыш ишине тиешеси бар башка жарандарды аныктоо боюнча атайын тергөө амалдары жүргүзүлүүдө.