Бишкекте балдар үчүн "Тез жардам" ооруканасынын жаңы имаратынын курулушу башталды

Бүгүн, 1-сентябрда өлкө башчы Садыр Жапаров Бишкек шаарындагы балдардын медициналык тез жардам ооруканасынын жаңы имаратынын курулушуна старт берди. Бул тууралуу президенттин маалымат кызматынан кабарлашты.

Мамлекет башчысы бул жаңы имараттын курулушу сапаттуу медициналык кызмат көрсөтүүдө маанилүү аспект болот деп белгиледи.Төрт кабаттуу хирургиялык имараттын курулушу Сауд өнүктүрүү фондунун (Сауд Арабия Королдугу) жеңилдетилген насыясынын эсебинен каржыланат.

Жаңы имаратта 212 керебет жана 8 операциялык бөлүм: шашылыш хирургия, нейрохирургия, неонаталдык хирургия, хирургиялык инфекция, көкүрөк хирургиясы ж.б.у.с. болот. Ошондой эле имаратта радиология, реанимация проктологиясы жана токсикология, жаңы төрөлгөн ымыркайлардын реанимациясы, урология, травматология бөлүмдөрүн, морфологиялык кабинет, лабораториялык блок ж.б. жайгаштыруу пландалууда.