"Трагедия кылыштын кереги жок". Садыр Жапаров агасынын алтын кармап түшкөн сүрөтү тууралуу үн катты

Өлкө башчы Садыр Жапаров бир тууган агасы Сабыр Жапаровдун алтын кармап түшкөн сүрөтү тууралуу үн катты.

"Кабар" маалымат агенттигине берген маегинде президент сүрөт былтыр, 2021-жылы тартылганын тактады.

"Сүрөт боюнча мен тактадым. Түркияда түшкөн сүрөт экен. Эсиңиздерде болсо, былтыр эл аралык алтын сатууну уюштурган Лондондогу Баалуу металлдар базарынын ассоциациясы Кыргызстандын алтынын дүйнөлүк биржада сатуусуна чек коюп койгон. Ошол мезгилде түрк туугандар мага жана мамлекеттик чиновниктердин кабылдамасына кире алышпай, агама чыгышкан экен. (Бизде бюрократия жоюла элек да). "Биз сатып алалы. Бизге келип, алтын эриткен цехибизди көрүп кеткиле. Биздин алтын сатып алууга толук мүмкүнчүлүгүбүз бар" деп кайрылышыптыр. Ошол жерге барып, алтын кармап сүрөткө түшкөн экен. Эми муну трагедия кылыштын кереги жок го дейм. Ансыз деле аларга же башка жеке булактарга бир грамм да алтын сатылган эмес. Түрк туугандардан башка он чакты мамлекеттен жогорудагыдай сунуштар түшкөн", - деген Садыр Жапаров.