Акылбек Жапаров Кара-Кечедеги көмүр казуу иши менен таанышты

Министрлер кабинетинин төрагасы Акылбек Жапаров Нарын облусуна болгон иш сапарынын алкагында "Кара-Кече" көмүр кенинин иши менен таанышты. Бул тууралуу өкмөттүн басма сөз кызматынан маалымдалды.

Билдирүүгө ылайык, Жапаров 10-сентябрда көмүр кенинин "Борбордук" участкасында болуп, өндүрүштүк иштердин жүрүшү менен таанышып жана бир катар тапшырмаларды берди.

“Алдыдагы жылытуу мезгилине даярдык кынтыксыз болушу керек. Бекитилген план боюнча, “Кыргызкөмүр” ишканасы 2 677,0 миң тонна көмүр өндүрүп, камдашы керек. Андыктан өндүрүштүк иштер толук көлөмдө жүргүзүлүп, көмүр ташуу үзгүлтүксүз болушу керек. Мындан тышкары карьерде коопсуздук эрежелерин сактоо, тоо-тек үймөгүнүн кесепетинен аварияларга жол бербөө маанилүү. Бул багытта “Кумтөр” ишканасынын тажрыйбасын пайдалансаңыздар болот, биз тиешелүү байкоочу шаймандарды сатып алууга каражат бөлүүгө даярбыз”, - деди Акылбек Жапаров.

Белгилей кетсек, ушул жылдын 1-августунан тарта Бишкек шаарынын ЖЭБине, ошондой эле калкка, бюджеттик мекемелерге көмүр ташыла баштаган. Ишкана күнүнө 5,5 миң тоннага жакын көмүр жүктөп жаткандыгы айтылат.