Чек ара кызматы: "Чоң-Алайда абал кайрадан чыңалып жатат"

Саат 18:20га карата Ош облусунун Чоң-Алай районундагы кыргыз-тажик мамлекеттик чек ара тилкесинде кырдаал кайрадан чыңалып жатат. Бул тууралуу УКМКнын Чек ара кызматы кабарлайт.

Маалымдалгандай, ок атышууну токтотуу жана чек ара сызыгынан аскерлерин жана күчтөрүн чыгаруу боюнча бардык келишимдерди дагы бир жолу бузуп, тажик тарап Кыргызстандын “Карамык” чек ара заставасынын чек арачыларына ок атуучу жана топтук куралдардан ок чыгарган.

УКМКнын Чек ара кызматынын Чоң-Алай районундагы тарамдарынын өздүк курамы аймактардагы абалды турукташтырууга багытталган иш-чараларды жүргүзүүдө.

Эскерте кетсек, тажик тараптын Кыргызстандын аймагына куралдуу кол салуусу 14-сентябрда башталган. Эки тараптуу бир канча жолугушуулар өтүп, ок чыгарбоо боюнча макулдашууга жетишилгени менен тажик тарап аны кайрадан эле бузуп жатканы кабарланат.