Иманкулов: "Сөөктү кордоп, мууздап, кулактарын кесип... Буга чейин мындай мыкаачылыкты көргөн эмеспиз"

Тажикстандын Кыргызстанга куралдуу кол салуусу учурунда Кыргыз аскерлерин мыкаачылык менен өлтүргөн фактылар бар. Чек арадагы кырдаал учурунда тажик тараптан ооган жарандары, экстремисттер да жүрдү. Бул тууралуу маалымат жыйыны учурунда Коопсуздук кеңешинин катчысы Марат Иманкулов билдирди.

"Сөөктү кордоп, мууздап, кулактарын кескенге чейин барышты. Буга чейин мындай мыкаачылыкты көргөн эмеспиз. Бул согуштук аракеттерге экстремисттик-террордук уюмдардын өкүлдөрү катышкан белгилер бар. Сакалчан, курал көтөрүп жүргөндөрдүн бири ким экенин аныктадык. Ал Ооганстандын жараны, экстремисттик-террордук уюмдардын өкүлү экенин ошол өлкөнүн бийлиги тастыктады. Андыктан башка өлкөдөн жалданып келген адамдар катышты деп айта алабыз", - деди Иманкулов.

Куралданган топ эч кимге баш ийбей аскер күчтөрдү да, жай тургундарды да ылгабай аткылаган.

Коопсуздук кеңешинин катчысы чек арачылар, анын ичинде элди эвакуациялап жаткан ӨКМ кызматкеринин сөөгү кордолгонун айтты.