Чек арада шейит кеткен Эрлан Турсунбаевдин агасы: "Командир болгонуна 2 ай болуп калган"

Тажикстандын куралдуу кол салуусунан шейит кеткен Эрлан Турсунбаев Тамдык чек ара заставасынын командири болуп дайындалганына 2 ай болгон. Бул туурасында агасы Нуржан Турсунбаев билдирди.

Анын айтымында, маркумдун сөөгү Токтогул районунун Көтөрмө айылында 19-сентябрда жерге берилди.

Эрлан Жайыл районунун Кара-Балта шаарында 1996-жылы туулган. 2012-жылы Кара-Балта шаарындагы Раззаков атындагы техникалык институтунун экономика жана бухгалтерия кесибине ээ болгон. 2015-2019-жылдары Казакстандын Алмата шаарындагы улуттук коопсуздук комитетинин чек ара академиясын аяктаган. Андан соң офицер болуп Баткен облусунда кызмат өтөгөн.

"Эрлан Баткендеги Тамдык чек ара заставасынын командири болуп дайындалганына 2 ай болуп калган. Үй-бүлөдө үч бир туугандын кенжеси болчу. Үйлөнө элек. Акыркы жолу байланышканыбызда абал тынч деп жаткан. Кийинчерээк 2 күндөй байланыша албай калдык. 16-сентябрда каза болгон экен. Биз суук кабарды 18-сентябрда уктук", - дейт агасы Турсунбаев.

SUPER.KG порталынын жалпы жамааты шейит кеткен маркумдун жакындарына терең кайгыруу менен көңүл айтып, аза кайгысын тең бөлүшөт.