Баткенден Ош шаарына 5 миңден ашуун жаран келди

Ош шаарына Баткенден 5 миңден ашуун жаран келди. Бул тууралуу Ош шаардык мэриясынан билдиришти.

Маалыматка ылайык, борбордук аянтта ачылган Ош шаарынын борбордук штабы Баткен облусунан келген тургундарды жайгаштыруу боюнча тынымсыз иш алып барууда.

Мында мэриянын тиешелүү бөлүмдөрүнүн кызматкерлери, жаш активисттер, ыктыярчылар, медицина кызматкерлеринен турган бригада, ошондой эле кичи автобустар жаңы келген жарандарды убактылуу жайгаштыруу борборлоруна жеткирүүгө даяр турушат.

"Ал жерде мэриянын тиешелүү жетекчилери жана кызматкерлери күн сайын келип, психолог, медицина кызматкерлери тарабынан жардамдар көрсөтүлүүдө. Бул иштерге шаардагы жогорку окуу жайлардын жетекчилиги, бир катар мейманканалардын администрациясы колдоо көрсөтүүдө", - дешти мэриядан.

Расмий маалыматтар боюнча, Баткен облусунан келген 2500дөн ашык адам убактылуу жайгаштыруу борборлорунда турат. Алардын көбү аялдар жана балдар.

Ал эми расмий эмес маалыматтар боюнча, Баткен облусунан келип, шаардагы туугандары, достору, тааныштарынын үйүндө жашап жаткан тургундардын саны 5 миңден ашат.