Садыр Жапаров Баткен облусундагы кырдаал боюнча жумушчу кеңешме өткөрдү

Бүгүн, 22-сентябрда президент Садыр Жапаров Баткен облусундагы учурдагы кырдаал боюнча жумушчу кеңешме өткөрдү. Бул туурасында президенттин администрациясынан маалымдалды.

Маалыматка ылайык, кеңешмеге министрлер кабинетинин жетекчилиги жана мүчөлөрү, күч түзүмдөрүнүн жетекчилери, Коопсуздук кеңешинин катчысы катышты.

Анда чек ара коопсуздугун камсыз кылуу жана аймактагы талкаланган инфратүзүмдү калыбына келтирүү боюнча маалымат берилди.

Садыр Жапаров биринчи кезекте чек арага чектеш аймактардын эвакуацияланган тургундарына бардык зарыл болгон жардамдарды көрсөтүүгө, жабыркаган турак жайларды калыбына келтирүүгө жана толук кыйраган үйлөрдүн ордуна жаңыларын суук түшкөнчө кыска мөөнөттө курууга, социалдык-жарандык инфратүзүмдөрдү тез арада калыбына келтирүүгө байланыштуу бир катар конкреттүү тапшырмаларды берди.