Курман болгон мекен сакчыларынын жаркын элесине арналып Бишкекте баннерлер орнотулду

Бишкек шаарынын Малдыбаев-Ахунбаев, Тыналиев-Ахунбаев, Киев - Байтик Баатыр жана Чүй-Кулиев проспектилеринин кесилишинде жайгашкан билборддорго Баткендеги Тажикстандын куралдуу кол салуусунан курман болгон мекен сакчыларынын элесине арналган баннерлер орнотулду.

Анда Ички иштер министрлигинин Ички аскерлеринин аскер кызматкерлери: улук сержант Каныбек уулу Дурус, кенже сержант Манас Баатырбеков, улук сержант Акылбек Ташбеков, катардагы жоокер Айбек Абдилабекович жана ИИМдин атайын багыттагы полкунун кызматкери, милициянын ага сержанты Мыктыбек Мурзажановдун жаркын элеси эскерилген.

"Ушул сыяктуу ар бир окуя эрдиктин жана аскердик антка берилгендиктин белгиси болуп эсептелет. Аскер кызматкерлери менен милиция кызматкерлери Ата Мекенди коргоо өзгөчө милдет экенин тереңден түшүнүү менен бул куралдуу кол салууга каршы киришти. Анткени алар үчүн “Эрдик” деген жөн эле сөз эмес, күнүмдүк реалдуулук. Аларды өлкөбүздүн ар бир жараны таанууга татыктуу", - деп айтылат ИИМдин билдирүүсүндө.