Дүйнөлүк көчмөндөр оюндары: Кыргыз көк бөрүчүлөрү аттарды Түркиядан ижарага алат

Социалдык тармактарда талкууланып жаткан Дүйнөлүк көчмөндөр оюндарына бара турган аттар боюнча Маданият, маалымат, спорт жана жаштар саясаты министрлигинин Фейсбуктагы расмий баракчасына жарыяланды.

Маалыматта айтылгандай, Түркияда өтө турган Төртүнчү Дүйнөлүк көчмөндөр оюндарына, анын ичинде негизги оюн болгон көк бөрү оюнуна Кыргыз Республикасы толук кандуу түрдө даярданган.

"Кыргызстан бардык авиакомпаниялар менен сүйлөшүүлөрдү жүргүзгөн. Сүйлөшүүлөрдүн жыйынтыгында жалгыз гана «Муалем Авиейшн» компаниясы белгиленген шарттарда гана аттарды алып барып, кайра алып келүүгө мүмкүнчүлүгү бар экенин билдирген. Алдын ала сүйлөшүүлөр боюнча, аттарды 27-сентябрда алып барып, кайра Кыргызстанга 3-октябрда алып келүү макулдашылган.

Бирок Түркия тарап көк бөрү оюну Көчмөндөр оюндарына расмий мелдеш катары киргендиги тууралуу маалыматты кеч бергендиктен, аттарды кайра Кыргызстанга алып келүүдө авиакомпаниянын учуу мөөнөтүн системада башка тараптар ээлеп алгандыгы белгилүү болгон. Ошондой эле кайра аттарды Кыргызстанга алып келүү мөөнөтү 2 жумадан узак убакытка чейин созулуп калган. Мындай узак мөөнөткө аттарды Түркияда кармоо шарты Кыргызстан үчүн туура келбегендиктен, оюнга катышуу үчүн аттарды Түркиядан ижарага алуу чечими чыккан.

Ушундай эле көрүнүшкө Казакстандын да командасы туш болду. Маалыматка ылайык, аталган авиакомпания Кыргызстандын 24 жана Казакстандын 15 атын алып кетмек. Бүгүнкү күндө Кыргызстан да Казакстан да аттарды ижарага алышты. Оюнчулар көчмөндөр оюндарына катышууга толук даяр", - деп айтылат министрликтин билдирүүсүндө.