Чек арага жакын айылдардын тургундары облус башчысына бир нече талаптарды коюшту

Президенттин Баткен облусундагы өкүлү Абдикарим Алимбаев Тажикстандын кол салуусунда болжол менен канча турак үй жараксыз абалга келгенин жана калыбына келтирүү иштери тууралуу журналисттерге маалымат берди.

"14-17-сентябрь күндөрү болгон чек арадагы чыр-чатактын негизинде бүгүнкү күндө чек арага жакын жайгашкан айылдардын тургундары Кадамжай районунда, Баткен районунда жана Баткен шаарында жайгашкан мектептерде, кээ бирөөлөрү жарандардын үйлөрүндө жашап жатышат. Эки күндөн бери ал жарандар облустук администрацияга келип мени менен жолугушуу өткөрүштү. Алар бир канча талаптарды коюшту:

1)Чек арадагы чыр-чатакты аягына чейин токтотуу, тынчтыкты сактап калуу маселеси;

2)Калыбына келтирүү иштерин тезирээк жүргүзүү; 3)Жаракат алган жарандарга жардам берүү жана жараксыз болгон үйлөрдү тезирээк куруу деген талаптары менен келишти.

Мен тиешелүү жоопторду бердим. Азыр бул боюнча биз иштеп жатабыз. Мамлекеттик деңгээлдеги комиссия түзүлүп, ал комиссия учурда ишин активдүү баштады. Комиссия болжол менен канча зыян келтирилгенин санап чыгышты. Анда 618 үй толук талкаланган, анын ичинен 453 үйдү оңдоп-түзөө иштеринен өткөрсө болот. 165 үйдү капиталдык оңдоп-түзөөдөн өткөрсө болот. Ар бир үй-бүлөгө үй куруп, аягына чыккыча кандай жардамдарды көрсөтүшүбүз керек, балдар окууга кандай барат ушул маселелер боюнча жыйын өтүп, райондордогу мекемелердин башчыларына тапшырма берилди", - деди облус башчысы.