Садыр Жапаров Төртүнчү Дүйнөлүк көчмөндөр оюндарынын ачылыш аземине катышты

Президент Садыр Жапаров 29-сентябрда Изник шаарында Төртүнчү Дүйнөлүк көчмөндөр оюндарынын ачылыш аземине катышты. Бул тууралуу президенттин маалымат кызматынан кабарлашты.

Ачылыш аземи башталардын алдында мамлекет башчысы Садыр Жапаров менен Түркиянын президенти Режеп Тайип Эрдоган учурашып, андан соң эки өлкөнүн президенти, ошондой эле башка делегация башчылары оюндардын ачылыш аземи өтүп жаткан стадионго өтүштү.

Салтанаттуу иш-чара түрк дүйнөсү менен көчмөндөрдүн маданиятына арналган театралдаштырылган шоунун коштоосунда болду. Аземдин алкагында түрк дүйнөсүнүн чыгармачыл жана бий топтору чыгышты, анын ичинде Кыргызстандан да 30га жакын маданият ишмерлери, анын ичинде "Камбаркан" фольклордук-этнографиялык ансамбли, солисттер жана режиссёрдук топ өз өнөрлөрүн тартуулашты.

Мындан тышкары оюндарга катышуучу өлкөлөрдүн парады да өттү.

Төртүнчү Дүйнөлүк көчмөндөр оюндары 29-сентябрдан 2-октябрга чейин "Биримдикти жана салтты сактайбыз, келечекке карайбыз!" деген ураандын алдында өтөт.

Ага 102 өлкөдөн 3 миңден ашык спортчу катышат. Мелдештерге Кыргызстандын атынан 148 спортчу катышат.