Шайлообек Атазов өлкөдө иштеген жарандарды айлыгынан аскердик техника алууга 200 сомдон берип турууга чакырды

Өлкөдөгү бардык улуттун өкүлдөрү аскерге барууга милдеттүү. Бул тууралуу Жогорку Кеңештин депутаты Шайлообек Атазов Эл аралык иштер, коргоо, коопсуздук жана миграция боюнча комитетинин жыйынында айтты.

"Салык кодексинде иштеп жаткан 18 жаштан өткөндөр аскердик техника алуу үчүн айлыгынан ай сайын 200 сомдон берип турса. 1 миллион адам иштесе ар айда эле 200 миллион сомдон түшүп турат экен. Ошону 5 жылдай киргизип туруш керек болуп жатат. Бул кийим-кечек, тамак-ашка эмес, бир гана аскер куралдарын алуу үчүн. Буга ар бир кыргыздын патриоту айлыгынан 200 сомдон берип турганга макул болсо керек деп ойлойм", - деди Атазов.

Ошондой эле Шайлообек Атазов Кыргызстандагы бардык улуттун өкүлдөрү аскерге баруусу керектигин айтып, аскерге кызмат өтөөнүн мөөнөтүн 1 жыл эмес, 1 жарым жыл кылууну карап көрүү керек экендигин белгиледи.