Иран өлкөдө болуп жаткан баш аламандыкка АКШ менен Израилди күнөөлөдү

Ирандын лидери Али Хаменеи өлкөдөгү баш аламандыктарды АКШ жана Израил бийлиги пландаганын айтты. Бул тууралуу чет элдик басылмалар жазышты.

Маалыматка ылайык, анын айтымында Ирандагы тополоң пландалган жана полиция тарабынан кармалган 22 жаштагы Махса Амининин өлүмү жөн гана шылтоо болгон.

"Мен ачык айтам, бул толкундоолор жана туруксуздуктар Америка жана Израил тарабынан пландалган. Ал эми алардын кызматкерлери жана чет өлкөдөгү кээ бир бузуку ирандыктар тополоң кылууга жардам беришкен", - деген ал.

Эске салсак, Иранда 22 жаштагы Махса Амини аттуу кыз хиджабды туура эмес кийгендиги үчүн полиция тарабынан кармалып, көп өтпөй комага түшүп каза болгон. Бул окуядан кийин Ирандын 100дөн ашуун шаарларында жана 30 провинциясында массалык нааразычылык акциялары өтүп, баш аламандыктар катталган. Бул акциялардан кеминде 30дан ашык адам каза болгон.