Караколдо Кыргызстан боюнча эң биринчи таштандыны кайра иштетүүчү завод курулат

4-октябрда Каракол шаарында Кыргызстан боюнча эң биринчи таштандыны кайра иштетүүчү завод куруу боюнча белорусиялык компания менен келишимге кол коюлду. Бул тууралуу Каракол шаардык мэриясынан маалымдашты.

Ал “Каракол өсүү чекити” долбоорунун алкагында, республикалык бюджеттин эсебинен курулмакчы. Ага жалпы 135 миллион сом бөлүнүп, тендерди 111 миллион сомго Белорусиялык “Сифания Экотехника” компаниясы утуп алган.

Тендер бардык компаниялар үчүн ачык, бирдей шарт менен уюштурулган. 111 миллион сом заводду курууга жумшалса, калган 24 миллион сомго завод орун алчу жерге ангар курулуп жана башка жумуштар аткарылмакчы.

Заводду алып келип, орнотуу 90 күн ичинде ишке ашышы керек, ноябрь айында бардык жабдыктар алып келинип, декабрь айында жумушчуларды окутуу процесси жүрөт. Долбоордун негизинде 40-50 жумушчу орун түзүлөт.

"Таштандыны бөлүү иштери азыркы полигондо орун алат, ал эми кайра иштетүүчү процесстери Каракол шаарынын “Тазалык” ишканасында болот", - деп жазылат билдирүүдө.