Орусиянын аймагына кирүүдө жаңы мыйзамдар күчүнө кирди. ИИМдин билдирүүсү

Өлкөнүн ички иштер министрлиги Орусияга ишке орношуу максатында бара жаткан кыргызстандыктарга чек арадан кирүү эрежелерин эскертти.

Министрлик Орусиянын 2021-жылдын 1-июлундагы №274-ФЗ "Орусиядагы чет элдик жарандардын укуктук абалы жөнүндөгү" жана "Орусиядагы мамлекеттик дактилоскопиялык каттоо жөнүндөгү" мыйзамдары күчүнө киргендигин маалымдады.

Ага ылайык, Кыргызстандын жарандары төмөнкүлөргө милдеттүү:

- Орусия Федерациясына кирген күндөн тартып 30 календарлык күндүн ичинде бир жолу манжа изин мамлекеттик каттоодон жана сүрөткө түшүүдөн өтүүгө;

- Орусияга барганда 30 күн аралыгында баңгизат же дарыгердин көрсөтмөсү жок психотроптук каражаттарды колдонбойбу, жугуштуу жана ВИЧтен улам пайда болуучу оорулар бар же жок экенин аныктоо үчүн медициналык кароодон өтүшү керек;

- Медициналык документтердин мөөнөтү аяктагандан кийин 30 күндүн аралыгында ИИМдин аймактык бөлүмүнө жаңыртылган медициналык документтерди көрсөтүп туруу керек.

"Эгерде кыргызстандыктар бул талаптарды аткарбаса, алардын Орусиянын аймагында жүрүү мөөнөтү кыскарат. Ушуга байланыштуу Орусияга бара жаткан мекендештерге жогоруда аталган Федералдык мыйзам менен таанышууну жана жаңы талаптарды сактоону сунуштайбыз", - деп айтылат маалыматта.