Вагондо жашап келишкен. Сузакта селден жабыркаган 8 үй-бүлө ак өргөөлүү болду

Сузак районунун Кара-Дарыя айылында селден жабыр тарткан 8 үй-бүлө үйлүү болду. Маалыматты райондук администрациядан маалымдашты.

Билдирүүгө ылайык, үйлөрдүн ачкычтарын тапшыруу аземине президенттин Жалал-Абад облусундагы ыйгарым укуктуу өкүлү Абсаттар Сыргабаев, Сузак районунун акими Баратбек Сыдыкназаров, Жогорку Кеңештин депутаты Жеңиш Токторбаев жана жергиликтүү тургундар катышты.

8 үй-бүлөнүн турак жайы селден жабыркап, жашоого жараксыз абалга келген болчу. Тургундар бир жылдан бери вагондо жашап келген.

Белгилей өтсөк, селден жабыркагандарга жер тилкеси ажыратылып, мамлекет тарабынан 5 миллион 600 миң сом акча каражаты бөлүнгөн. Мындан сырткары мекеме-ишкана кызматкерлеринин бир күндүк эмгек акылары которулган.

Ал эми Сузак райондук мамлекеттик администрация тарабынан кыш жана башка материалдык колдоо көрсөтүлгөн. Жалпысынан сегиз үйдү курууга 12 миллион сом жумшалган.