"Генерал болом". Дайынсыз болуп жаткан Дастан Анарбековдун эжеси аны менен акыркы жолу эмне жөнүндө сүйлөшкөнүн жарыялады

" - Аскердик наам алган турбайсыңбы, куттуктайм! Азаматсың Дастан!

- Рахмат эже, мен буюрса генерал болом", - деп WhatsApp тиркемеси аркылуу сүйлөшкөнүн дайынсыз болуп жаткан Дастан Анаркуловдун эжеси Нурила Субанбердиева жеке баракчасына жүктөдү.

Анда Дастан 1-2 жылда үйлөнө турганын жазганын билдирген. Акыркы жолу 16-сентябрь күнү эртең менен байланышканын жазган.

Баткендеги Достук айылындагы чек ара тозотунун жетекчисинин орун басары болуп иштеп жаткан Дастан Анарбеков 17-сентябрдан бери дайынсыз.

Ал ушул жылы Бишкектеги Калыйнур Үсөнбеков атындагы аскер окуу жайын аяктап, Баткенге иштөө үчүн бир ай мурда барган.

14-16-17-сентябрь күндөрү Тажикстандын агрессиясынан кийин Дастандын ата-энесине анын курман болгонун угузуп, кара кагаз беришкен. Бирок ушул күнгө чейин анын сөөгү келе элек.

Бирок ушул жылдын 5-октябрь күнү УКМК бронежилет кийген аскер кызматкеринин сөөгү табылганын, дене сыртынын 90 пайыздан ашыгы жабыркагандыктан анын аты-жөнүн дароо аныктоо мүмкүн болбогонун билдирген. Жүргүзүлгөн соттук-медициналык экспертиза табылган дене дайынсыз жоголгон лейтенант Дастан Анарбековго таандык болушу мүмкүндүгүн аныктаган.