"Кырдаалдын курчушуна салым кошпогула". Камчыбек Ташиев Баткенде жыйын өткөрдү

УКМКнын төрагасы Камчыбек Ташиев Баткен шаарында күч түзүмдөрүнүн жетекчилери, мамлекеттик органдардын өкүлдөрү үчүн жумушчу кеңешме өткөргөнүн Чек ара кызматынан билдиришти.

Анда Ташиев Баткен облусундагы мамлекеттик чек аранын кыргыз-тажик тилкесинде кырдаалды турукташтыруу жана чыр-чатактарды болтурбоо боюнча комплекстүү чараларды ишке ашыруу зарылдыгын белгиледи.

"Чек ара жана чек ара аймактарында жаралып жаткан бардык көйгөйлүү маселелерди саясий жана дипломатиялык жол менен, сүйлөшүү үстөлүндө гана чечүү зарыл. Чек ара маселеси эки мамлекеттин кызыкчылыгына тиешелүү. Андыктан ар кандай даражадагы чиновниктер да, карапайым жарандар да чек арадагы кырдаалдын курчушуна салым кошуп, сүйлөбөшү керек. Бүгүнкү күндө баарыбызга – Кыргызстанга да, Тажикстанга да тынчтык жана стабилдүүлүк, эки өлкөнүн туруктуу өнүгүүсү керек", - деп белгиледи Ташиев.

Ташиев кабыл алынган чечимдер аткарылбаса Баткендеги күч органдары менен мамлекеттик органдардын жетекчилери керт башы менен жооп берерин айтты.