Блогер Ырыс Жекшеналиев үй камагына чыгарылды

Бүгүн, 26-октябрда Бишкек шаардык сотунда блогер, активист Ырыс Жекшеналиевдин баш коргоо чарасы каралып, аны үй камагына чыгаруу чечими чыкты.

10-октябрда Бишкектин Биринчи Май райондук соту анын абактагы мөөнөтүн дагы эки айга узарткан чечим чыгарган. Ал №1 тергөө абагында болчу.

Фейсбуктагы “Полит Узник” баракчасынын администратору, 19 жаштагы Жекшеналиев 14-августтун кечинде милицияга бир нече саат сурак бергенден кийин камалган. Анда ал Ички иштер министрлигинин Тергөө кызматына чакыртылып, Фейсбукка тараткан УКМКнын мурдагы төрагасы Абдил Сегизбаевдин маалыматы боюнча тергөөгө тиешелүү көрсөтмөлөрүнө жооп берген.

Милиция "Полит Узник" баракчасындагы жарыяланган эски видео "Жетим-Тоо" кенинин айланасындагы абалды курчутуу максатында коомдук ой-пикирди атайылап манипуляциялоого багытталгандыгы байкаларын билдирип, Кылмыш-жаза кодексинин 278-беренесине (Массалык башаламандык) ылайык кылмыш ишин козгогон.