Ош шаарында эртеңден тарта жылуулук берилет

Ош шаарында эртең, 28-октябрдан тарта бардык социалдык объектилерге жана турак жайларга жылуулук берилет. Бул тууралуу Ош шаардык мэриясынын басма сөз кызматынан кабарлашты.

Белгиленгендей, Ош шаарынын мэриясында кыш мезгилиндеги жылуулук маселеси боюнча шаардык штабдын жыйыны болуп өттү.

Калаа башчысы Алмаз Мамбетов 28-октябрдан баштап бардык социалдык объектилерге жана турак жайларга жылуулук берип баштоо боюнча буйрукка кол койгон.

Маалым болгондой, каттын негизинде бир катар саламаттыкты сактоо мекемелерине (облустук төрөт үйү жана шаардык төрөт үйү) 22-октябрдан баштап, айрым социалдык объектилерге (“Боорукердик” интернаты, №81 “Балапан” балдар бакчасы) 24-октябрдан тарта жылуулук берилген.

Тиешелүү кызматкерлерге жашоочулар арасында үйлөрдүн жылуулук тармактарын текшерип, даярдоо боюнча түшүндүрүү иштерин жүргүзүү тапшырылды.