Эл өкүлү Баткенден келген студенттерге жеңилдик берүүнү демилгеледи

Кыргыз-тажик окуясына байланыштуу кээ бир студенттер окууга келбей калып, окуядан улам окууга көңүлдөрү да жок болгон. Азыр модулдар башталып, коррупцияга батып калган окуу жайлар алардан 2000ден 5000ге чейин акча талып кылып жатышат. Бул тууралуу парламенттин бүгүнкү жыйынында эл өкүлү Айбек Маткеримов билдирди.

“Кечээ мага Баткендин тургундарынан, жогорку окуу жайда окуп жаткан студенттерден кайрылуу келди. Соңку болгон каргашалуу окуяны эске алып, баткендик студенттерибизге бардык окуу жайдан, кышкы сессиялардан жеңилдик берип, автоматтык түрдө зачётторун коюп берсе, кийин окууларын улантып кетет эле. Анткени алар өтө чоң психикалык жабыр тартышты. Менимче алардын окууга да көңүлү жок”, - деди Маткеримов.

Эске салсак, ушул жылдын 14-16-17-сентябрь күндөрү орун алган Тажикстандын куралдуу кол салуусунан улам 63 Кыргыз жараны шейит кетти. Жабыркагандардын саны 200гө чамаласа, 200 миңге жакын жаран эвакуацияланган.