"Үй-бүлөмдүн курчоосунда белгилейм". Гүлнур Сатылганова 54 жашка толду

Бүгүн, 1-ноябрь Кыргыз Республикасынын Эл артисти Гүлнур Сатылганова 54 жашка толуп, туулган күнүн белгилеп жатат. Ырчыны куттуктап байланышканыбызда, туулган күнүн үй-бүлөсүнүн курчоосунда белгилей турганын билдирди.

"Туулган күнүмдү ызы-чуусу жок эле, үйдө неберем, куда-кудагыйларым, үй-бүлөм менен белгилейм. Досторум болсо кечээ кечинде куттуктап кетишти", - дейт ырчы.

Гүлнур Сатылганова 1968-жылы 1-ноябрда Жалал-Абад облусуна караштуу Токтогул шаарчасында туулган. Мектепти 1985-жылы Токтогулдан аяктап, 1987-жылы Искусство институтунун хор-дирижёрлук бөлүмүн бүтүргөн. Алгач "Жетиген" ансамблинде, андан соң "Арашан" фольклордук тобунда эмгектенген.

Ырчы "Каалайм сага", "Сагыныч", "Сүйөмүн моокум канбастан", "Кызыл өрүк", "Кызгалдак гүлүм", "Туулган жерди сагынуу" "Булуттар", "Ыр десте" аттуу ырлар менен атактуулукка жетишкен. "Кыргыз Республикасынын Эмгек сиңирген артисти", "Кыргыз Республикасынын Эл артисти" наамдарынын ээси, "Ариет" уюмунун Ардак грамотасы менен сыйланган.

Ошондой эле "Супер-Инфо" гезитинин тандоосу боюнча "Заманыбыздын супер ырчысы" деп табылган.

1-ноябрга карата жылнаама.