Журналист Санрабия Сатыбалдиева 48 саатка камалды

Бүгүн, 4-ноябрга караган түнү журналист Санрабия Сатыбалдиева камалды. Журналист менен кошо оператору Калыс Аширбеков да кармалган. Бул тууралуу укук коргоочу Азиза Абдрасулова Фейсбук баракчасына жазды.

Белгилүү болгондой, журналисттин үйүндө тинтүү жүргүзүлүп, андан соң убактылуу кармоочу жайга 48 саатка киргизилген.

Анын колунда 2 жашар кызы бар жана учурда кош бойлуу. Укук коргоочу Азиза Абдрасулованын айтымында журналисттин ден соолугуна коркунуч бар.

Санрабия Сатыбалдиева "Мир24" сайтында иштейт.

Ал эми Ички иштер министрлиги Санрабия Сатыбалдиева акча талап кылган деген шек менен кармалганын билдирди.

Журналист кечээ, 3-ноябрда системалуу түрдө опузалап акча талап кылган бир катар адамдар 2000 доллар которгон учурда пара менен кармалган. Сатыбалдиева аларды мындан бир нече жыл мурда жазылган аудиону жарыялоо менен шантаж кылганы айтылды.