Баткенде контрабандалык жүк ташыган жарандын унаасы мамлекетке чегерилди

Баткен облусунда контрабандалык жүк ташыган унаа конфискацияланды. Бул тууралуу бүгүн, 12-ноябрда УКМКнын басма сөз кызматынан билдиришти.

Маалыматка ылайык, атайын кызмат тарабынан Баткен облусунун аймагында контрабандага каршы күрөшүүнүн алкагында 7-октябрда Кара-Бак айылынын чек ара тилкесинде И.К.А. аттуу Кыргыз жаранынын башкаруусундагы Хонда-Фит үлгүсүндөгү унаа текшерүүгө алынып, анын ичинен көп көлөмдөгү насвай табылып алынган.

Аталган фактынын негизинде Мамлекеттик бажы кызматынын Баткен бажысы тарабынан кылмыш иши козголгон.

"9-ноябрда Баткен райондук соту президенттин улуттук экономиканын кызыкчылыктарын коргоого жана контрабандага каршы күрөшүүгө багытталган чараларды күчөтүү боюнча тапшырмасына ылайык, И.К.А.ны күнөөлүү деп таап, унаасын мамлекетке чегерүү чечими чыгарылды", - деп айтылат маалыматта.