Токтогулда жоогазындын өзгөчө жаңы түрү табылды

Америкалык окумуштуулар Кыргызстанга болгон экспедиция учурунда жоогазындын жаңы жана адаттан тыш түрүн табышты. Бул тууралуу Би-Би-Си жазып чыкты.

Маалыматта айтылгандай, экспедиция тобунун мүчөсү, Кембридж университетинин аспиранты Бретт Вилсон бул ачылыш абдан кызыктуу болгонун айткан.

"Бул жапайы жоогазын сыртынан гүлдүн башка түрлөрүнө окшош. Бирок Кембридж университетинин Өсүмдүк таануу департаментинде жүргүзүлгөн ДНК тесттери ал жоогазындын жаңы түрү экенин тастыктады. Бийиктиги 10 сантиметрден 19 сантиметрге чейин жеткен өсүмдүк тоолуу Токтогул аймагынан табылгандыктан Токтогул жоогазыны (Tulipa toktogulica) деп аталды", - деген Вилсон.

Ошондой эле маалыматта топту Кембридж университетинин Ботаникалык бакчасынын куратору Сэм Брокингтон, Fauna and Flora International (FFI) уюмунун өкүлү Дэвид Гилл жана Борбордук Азиядан, анын ичинде Кыргызстандын Улуттук илимдер академиясынын адистери жетектегени айтылат.

Белгилей кетсек, "Tulipa toktogulica" коргоо статусун алды жана эми аны Ботаникалык бакчадагы үрөндөрдөн көбөйтүү аракети көрүлөт, бул бир нече жылга созулушу мүмкүн.