Бишкектеги Жоомарт Бөкөнбаев көчөсүнө бетон тосмолор орнотулду

Бишкек шаарындагы Жоомарт Бөкөнбаев көчөсүнүн акыркы батыш бөлүгүнө бетон тосмолор орнотулду. Бул тууралуу милициянын кайгуул кызматынан билдиришти.

Маалыматка ылайык, буга чейин аталган жол жээгинде унаалар туура эмес токтотулган учурлар орун алып келген. Жадакалса, жол кыймылынын башка катышуучуларына да тоскоолдуктарды жаратып, туура эмес токтоткон унаалардан айланып өткөн унаалар жол тыгындарын пайда кылып келген.

Жарандардан да бул багытта кайрылуулар келип түшкөн.

"Мына ушундай баш аламан токтотуулардын алдын алып, кайгуул кызматынын жол көзөмөлдөө бөлүмү Бөкөнбаев көчөсүнүн батышты карай бара жатканда Жаш Гвардия бульварынан кийинки бөлүгүнө атайын бетон тосмолорду орнотушту", - деп билдиришти кайгуул кызматынан.