Курултайда Баткендеги талкаланган үйлөрдүн курулушу жай жүрүп жатканы айтылды

Бүгүн, 26-ноябрда Бишкекте өтүп жаткан Элдик курултайда Баткен шаарынан келген делегат Хаит Айкынов Тажикстандын кол салуусунда талкаланган үйлөрдүн курулушу кечеңдеп жатканына токтолду. Ал чек арада эң биринчи коопсуздукту камсыз кылып берүүгө чакырды.

“Быйылкы жаңжалда 360тан ашык үй күйүп кетти. Азыр ал үйлөр курулууда. Убагында курулуш иштери кышка чейин бүтүп, жергиликтүүлөр үйүнө кирери айтылган. Бүгүнкү күндө үйдүн ээлери, куруучулары менен сүйлөшсөм, быйыл бүтчүдөй эмес. Бүтпөйт окшойт. Буга бирөө-жарым жооп береби? Же президенттин сөзү аткарылбай калса боло береби?", - деди делегат Айкынов.

Ошондой эле ал президенттен маселени өз көзөмөлүнө алуусун өтүндү.

Белгилей кетсек, буга чейин Баткенде турак жайлардын курулушу жай жүрүп жатканы Жогорку Кеңеште бир нече ирет көтөрүлүп, министрлер кабинетине сын айтылган.