Манас күнүнө карата бир катар иш-чаралар өтөт (тизме)

4-декабрда “Манас күнүнө” карата Бишкекте бир катар иш-чаралар өтөт. Бул тууралуу Маданият, маалымат, спорт жана жаштар саясаты министрлигинин маалымат кызматынан билдиришти.

Бул жылы өтө турган иш-чаралар манасчы Токтогул Калманбет уулу 170, семетейчи Жаңыбай Кожек уулунун 150, манасчы Көкчеке-Мамбетаалы Ашымбай уулунун 125, манасчы Турдумамбет Акматалиевдин 100, семетейчи Сейдене Молдокееванын 100, манасчы Шаабай Азизовдун 95 жылдыгына карата арналат.

- 2-декабрда саат 14:00 дө Кыргыз Республикасынын эмгек сиңирген артисти Рысбай Исаковдун дүйнөлүк Гиннестин рекорддор китебине катталгандыгы тууралуу күбөлүгүн Улуттук тарых музейинде расмий тапшыруу аземи өтөт.

- 3–декабрда саат 14:00 дө Алыкул Осмонов атындагы Улуттук китепканада манасчы Салимбай Турсунбаевдин “Чоң казат” жана замандаштарынын эскермелери менен манасчынын соңку жылдарда жазган ырлары камтылган “Санаты сансыз-Салимбай” аттуу китептеринин бет ачары өтөт.

- 4-декабрь күнү саат 15:00 дө Токтоболот Абдумомунов атындагы Кыргыз улуттук академиялык театрында “Айкөлдүн аманаты” спектаклинин премьерасы коюлат.

Ошондой эле “Манас күнүнө” карата сүрөт көргөзмө, тегерек стол жана башка иш-чаралар республикалык, облустук жана райондук музейлерде, китепканаларда 2022- жылдын аягына чейин өткөрүлөт.

Андан тышкары “Манас күнүнө” арналган тематикалык фильмдер республиканын бардык театрларында жыл аягына чейин көрсөтүү милдеттендирилет.