Эки министрликте каржылык мыйзам бузуулар аныкталды

Саламаттык сактоо министрлиги менен Эмгек, социалдык камсыздоо жана миграция министрлигинен финансылык мыйзам бузуулар аныкталды. Бул тууралуу бүгүн, 2-декабрда Эсептөө палатасынын маалымат кызматынан кабарлады.

Маалыматка ылайык, бүгүн Эсептөө палатасынын кеңешинин кезектеги жыйыны болуп, ага кеңештин мүчөлөрү, аппараттын кызматкерлери жана аудит өткөрүлгөн объектилердин жетекчилери катышкан.

Анда күн тартибиндеги башка маселелер менен катар эле аталган эки министрликти текшерүүнүн жыйынтыгы тууралуу маселе каралган.

"Саламаттык сактоо министрлигинен аудиторлор 29 215 600 сомдук каржылык мыйзам бузууларды аныктаса, анын 17 350 800 сому калыбына келтирилүүгө тийиш болчу, текшерүүнүн жүрүшүндө 875 100 сом өндүрүлгөн. Ошондой эле 11 099 100 сом эмгек акынын негизсиз төлөнүшү, 1 163 400 сомдук материалдык баалуулуктарды жана каражаттарды эсептен чыгаруу катталган. Командировкаларга ашыкча каржылык чыгымдардын көлөмү 100 800 сомду түздү. 3 314 300 сомдук дебитордук карызды жаап-жашыруу аныкталган. Текшерүүнүн жыйынтыгы боюнча 13 007 200 сом суммасында резервдер жана бюджеттик жоготуулар аныкталган. Рационалдуу эмес пайдаланылган каражаттардын суммасы 22 795 800 сомду түзгөн", - деп айтылат маалыматта.

Ал эми Эмгек, социалдык камсыздоо жана миграция министрлигинде жүргүзүлгөн аудит майыптык коляскаларды сатып алууда мыйзам бузууларды аныктаган. Майыптар коляскасына чукул муктаждык болгонуна карабай, министрлик аларды түздөн-түз өндүрүүчүлөрдөн сатып албагандыгын, бааларга көзөмөл жүргүзүлбөгөндүгүн билдирди.

Бул мыйзам бузуулар боюнча маалымат тиешелүү органдарга жөнөтүлөрү кошумчаланды.