Токторбаев: "Байкуш мугалимдер 5 миң сом, элди талап-тоногон соттор 100 миң сом пенсия алат"

Бүгүн, 8-декабрдагы Жогорку Кеңештин жыйынында Жеңишбек Токторбаев мугалимдер менен соттордун алган пенсиясында канча айырма болоруна кызыкты.

Эл өкүлү Соцфонддун төрагасы Бактияр Алиевден "25 жыл иштеп пенсияга чыккан мугалим жана сот канча пенсия алат?" деп суроо салды.

Алиев ага алган айлык маянасына жараша болорун, азыр айта албастыгын жана кийинчерээк эсептеп кат түрүндө маалымат жөнөтөрүн билдирди.

"Жооп бере албаганыңыздын себебин билем. Бул жерде абдан чоң айырма бар. 25 жыл мугалим болуп иштеген байкуш 5 миң сом пенсия алат. Өмүр бою элди тоноп, талап жеген сот 100 миң сом пенсия алат", - деди Токторбаев.

Ошондой эле ал 15-20 жыл сот болуп иштегендердин пенсиясына 1,5 эсе, 20-25 жыл иштегендерге 2 эсе, ал эми 25 жылдан ашык иштеген соттордукуна 2,5 эсе үстөк акча кошуларын айтты.

"Соттор 2010-жылдан тарта "Соттордун сатусу жөнүндө" мыйзамдын негизинде пенсия ала баштаган. Ага ылайык, 40 миң сом алып 15 жыл сот болуп иштеген пенсионер 1,5 эсе кошулганда 60 миң сом пенсия алат, эгер 25 жыл иштеген болсо 100 миң сом алат. Бул адилетсиздик", - деди эл өкүлү.